Haqqinda.az

Kişinin naməhrəm qadının bədəninə, habelə saçlarına baxması, istər ləzzət məqsədi ilə olsun, istərsə də ləzzət məqsədi ilə olmasın, istər harama düşmək qorxusu olsun, istərsə də olmasın, haramdır. Onların üzünə və biləklərinə qədər əllərinə baxmaq isə ləzzət məqsədi ilə olsa və yaxud harama düşmək qorxusu olsa, haramdır. Müstəhəb ehtiyata görə, ləzzət məqsədi və harama düşmək qorxusu olmasa da onlara baxmasın. Həmçinin qadının naməhrəm kişinin bədəninə baxması ləzzət məqsədi ilə və harama düşmək qorxusu olsa, haramdır. Hətta vacib ehtiyata əsasən, bunlar olmasa da, baxmasın. Amma qadının kişinin bədəninə, başına, qollarına və ayaqlar kimi adətən kişilərin örtmədikləri yerlərinə baxması ləzzət məqsədi və harama düşmək qorxusu olmasa, eybi yoxdur.
Bir şəxsin örpəkli olmağa əmr etdiyi halda, əmrinə əhəmiyyət verməyən, qorxusuz halda açıq-saçıq gəzən (geyiminə laqeyd olan) qadınların bədəninə ləzzət məqsədi və harama düşmək qorxusu olmamaq şərti ilə baxmasının eybi yoxdur. Bu hökmdə kafirlərin qadınları ilə digər qadınlar arasında, habelə əl və üzlə, adətən, bədəninin örtmədikləri digər yerləri arasında bir fərq yoxdur.





Qadın üz və əllərindən başqa saçını və bədənini naməhrəm kişidən örtməlidir və vacib ehtiyata əsasən, yetkinlik həddinə çatmamış, amma yaxşı-pisi başa düşən oğlan uşağı da qadının bədəninə baxdıqda, onun şəhvətinin təhrik edilməsinə ehtimal verilsə, qadın saçını və bədənini ondan örtülü saxlamalıdır. Amma qadın üz və biləklərinə qədər əllərini naməhrəm kişidən örtməyə bilər. Ancaq harama düşmək qorxusu olsa və yaxud kişini haram baxışa mübtəla etmək məqsədi olsa, bu iki halda, onları da örtmək vacibdir.
Yetkinlik həddinə (həddi-büluğa) çatmış müsəlmanın ayıb yerinə baxmaq şüşə arxasından, yaxud saf sudan, yaxud güzgüdən və yaxud bunun kimi şeylərdən olsa da, haramdır. Vacib ehtiyata əsasən, kafirin, eləcə yaxşı və pisi başa düşən və yetkinlik həddinə çatmayan uşağın ayıb yerinə baxmaq da həmin hökmü daşıyır. Amma ər-arvad bir-birinin bədəninin hər bir yerinə baxa bilərlər.
Bir-birinə məhrəm olan kişi və qadın ləzzət məqsədi və harama düşmək qorxusu olmadığı təqdirdə, ayıb yerlərindən başqa bir-birinin bədəninin hər bir yerinə baxa bilərlər.
Kişi ləzzət məqsədi ilə başqa kişinin bədəninə baxmamalıdır. Qadının da başqa qadının bədəninə ləzzət məqsədi ilə baxması haramdır. Hər iki halda, harama düşmək qorxusu varsa, həmin hökmü daşıyır.





Əgər bir kişi naməhrəm bir qadını tanısa, laqeyd qadınlardan olmadığı təqdirdə, vacib ehtiyata əsasən, onun (örpəksiz) şəklinə baxmamalıdır. Üz və əllərindən başqa, ləzzət məqsədi və harama düşmək qorxusu olmadığı təqdirdə, bu iki üzvə baxmaq caizdir.
Əgər qadının (məsələn, tibb bacısının) başqa bir qadını və ərindən başqa bir kişini (müalicə məqsədilə) imalə etməsi və yaxud onun ayıb yerini suya çəkməsi lazım gəlsə, əlinə bir əlcək və s. geyinsin ki, əli onun ayıb yerinə toxunmasın. Həmçinin bir kişinin başqa bir kişini, yaxud arvadından başqa bir qadını imalə etməsi və ya onun ayıb yerini suya çəkməsi lazım gəlsə, bu halda da həmin hökmü daşıyır.
Əgər qadın bir xəstəlikdən müalicə olunmağa naçar olsa və naməhrəm bir kişi onu müalicə etmək üçün münasib olsa, naməhrəm kişiyə müraciət edə bilər. Həmin kişi müalicə məqsədilə ona baxmağa və onun bədəninə əl vurmağa məcbur olsa, eybi yoxdur. Amma baxmaqla müalicə edə bilsə, əlini onun bədəninə vurmamalıdır. Əgər əl vurmaqla müalicə edə bilsə, ona baxmamalıdır.
Əgər insan bir şəxsi müalicə etmək məqsədilə onun ayıb yerinə baxmaq məcburiyyətində olsa, vacib ehtiyata əsasən, güzgünü qarşısına qoyub, ona güzgüdən baxmalıdır. Amma ayıb yerinə baxmaqdan başqa bir yolu olmasa, eybi yoxdur. Həmçinin əgər ayıb yerinə baxmaq müddəti güzgüdən baxmaq müddətindən az da olsa, həmi hökmü daşıyır