Britaniya Tİbb Assosiasiyasının (British Medical Association, BMA) keçirdiyi sorğu göstərmişdir ki, ötən il Böyük Britaniyada hər üç həkimdən biri pasientlər tərəfindən fiziki zorakılığa və sözlü təhqirə məruz qalmışdır.
Sorğu aparılmış 591 nəfər həkimin onda biri fiziki hücumlarla qarşılaşmışdır. Hirslənmiş pasientlər təpik və yumruqlarla onların üzərinə atılmış, üzlərinə tüpürmüş, dişləmişlər. Nəticədə həkimlərin 5%-i ciddi zədə almış, üçdə biri isə əzilmə və cırmaq izləri ilə canını qurtarmışdır. İş yerində zorakılığa ən çox qadınlar (37% qadın və 27% kişi) və cavan mütəxəssislər məruz qalmışdır.
Sorğu aparılan həkimlərin fikrincə, pasientlərin aqressivliyinin səbəbi onların aldıqları tibbi xidmətin keyfiyyətindən narazılığı olmuşdur. Uzun növbə sıralarında gözləyən xəstələr istədikləri reseptləri ala bilməyəndə öz hirslərini həkimlərdən çıxmışlar. Həmçinin bu sorğuda 2003-cü ildə BMA tərəfindən aparılan sorğuya nisbətən fiziki zorakılığın payının iki dəfə artdığı müəyyən olunmuşdur.
"Bu çox kədərləndirici bir nəticədir"-deyən BMA sədri Hamiş Meldrum (Hamish Meldrum) həkimlərin bir çoxunun belə halları bildirməyə meylli olmadığı nəzərə alınarsa, bu göstəricinin əslində daha çox olduğunu qeyd etmişdir. Onun fikrincə, zərər çəkmiş tibb işçilərini müdafiə etmək üçün tədbirlər görülməli, aqressiv pasientlərə qarşı isə müəyyən sanksiyalar tətbiq olunmalıdır.
Məlumatı BBC yaymışdır.
Tarix: 07.01.2013 / 19:37 Müəllif: *_*M_O_N_I_K_A*_* Baxılıb: 132 Bölmə: Umumi Xestelikler