beyaz.az

Haqqinda.az

Axtardığın haqqında - Hər gün yeni məlumat öyrən

21 dekabr 2012-ci il

Bu mövzu barədə çox fikirlər səslənib, ümumiyyətlə 2012-ci il haqqında çox yazılıb, müxtəlif dillərdə 30-a yaxın kitab dərc olunub, hətta film də çəkilib. Bütün bunlar insanların tələbatından, daha doğrusu, onların daxili suallarına cavab tapmaq istəyindən irəli gəlib. Son günlər bu dalğa daha sürətlə insanların beynini nəinki məşğul etməyə, deyərdim ki, hədsiz qorxutmağa başlayıb. Peşəmdən asılı olaraq təbii ki, ən müxtəlif təbəqələrdən mənə hər gün onlarla narahat müraciətlər olunur. Və mən də insanlarımızı narahat edən bu kimi suallara cavab vermək üçün bu məqaləni yazmaq qərarına gəldim...

On ildən çoxdur ki, milli mətbuatımızda ən müxtəlif prizmalardan dünyada baş verəcək dəyişikliklərə münasibət bildirməkdəyəm. Amma onlarla məqaləni əhatə edən həmin araşdırmalarda bir dəfə də olsun dünyanın sonu və ya dağılması barədə fikir bildirməmişəm. Olsa-olsa, dünyanın “təmir” olunduğunu dilə gətirmişəm. Amma insanlar yaranışdan xof və qorxu içində İlahi Əmr olan Qiyamət Günü barədə tələskənlik etməyə sanki alışıblar.

Tanrı kəramətindən qidalananlar insanları saflığa çağırmaqla Son Günün əzablarından qurtulma və buna hazır olma yollarını göstərmiş, Şeytan hizbindən olanlarsa, insanları zaman-zaman təlaşda saxlamaqdan zövq almışlar. Tarixin müxtəlif dönəmlərində belə hallar tez-tez bir-birini əvəz edib, sonuncu belə “fürsət” də deyəsən, 2012-ci ildir. Şərə xidmət edən belə qüvvələr 1999-cu il üçün dedikləri səhv çıxdığından dərhal keçdilər 2012-yə. Özü də bunu ən müxtəlif formalarda diqqətə çatdırırlar: gah “göydən Yerə nəhəg asteroid gəlir”, gah “3-cü dünya müharibəsi başlayır”, gah da “təbii fəlakətlər dünyanı dağıdacaq” formasında. Özü də bu fikirləri təsdiqləmək üçün Nostradamus və Vanqadan, bəzən də digər öncəgörənlərdən sitat gətirirlər. Halbuki, adıçəkilən şəxslərin heç biri bu barədə yarım cümlə belə deməyiblər. Görünür, dünyanın siyasət dəllalları bu cür bəhanələrlə planetimizi təlaşda saxlamaq istəyirlər.

Bu kimi yanaşmaları bir kənara qoyub sırf astroloji qənaətlərimi sizlərlə bölüşmək istəyirəm. Əvvəlcə diqqəti 2003-cü ildə başlayan Sutökən Erasına ayırmaq yaxşı olardı. İstənilən astronomik era başlayanda planetimizdə əsaslı dəyişikliklərin baş verməsi qaçılmaz olur. Çünki bir mənzili təmir etmək üçün mütləq otaqda nələrinsə yerini dəyişirik və belə məqamlarda köhnə əşyalar ya tullanır, ya da sındırılır. Üstündə yaşadığımız Yer də bir mənzil timsalında olduğu üçün qalaktik dəyişikliklər baş verəndə mütləq təbiət «rəndə» rolunu oynayır. Bu səbəbdən də müxtəlif qitələrdə baş verən təbii fəlakət və digər hadisələri məhz yuxarıda deyilənlərlə əlaqələndirməliyik. Məlumatsız olanlar üçün eraların yerdəyişmə mahiyyətini qısaca izah edirəm.

İsa Məsihin (ə) dünyaya gəlişi ilə bərqərar olan Balıqlar Erası 1991-ci ildə sona çatdı və yeni eraya yetişmək üçün 12 illik keçid dövrü yaşadıq. Bu keçid dövründə nələrin olduğunu çoxlarımız gördük. Elə ilk ildə (1991) dünya üçün böyük qorxu yaradan, nəhəng imperiya olan SSRİ dağıldı, Balıqlar bürcünün daşıyıcısı olan Mixail Qorbaçovu Sutökən bürcünün daşıyıcısı olan Boris Yeltsinin əvəzləməsi bu dəyişikliyi rəmzləşdirdi. Dünyamızda demokratik dalğa güclənməyə başladı. Sovet ordusu Əfqanıstandan çıxarıldı, Almaniya birləşdirildi, soyuq müharibə təhlükəsi sovuşdu, Şərqi Avropa ölkələri yeni reformaya keçdi və s. Dünyanın enerji mərkəzi — bütün bəşəriyyətə çox sahələrdə örnək olan Azərbaycanda ilk məxməri inqilab baş verdi (1992), xalqlar öz müqəddəratını özləri həll etməyə başladılar, kommunizmin əleyhinə yaradılmış NATO gücləndi və Şərqə doğru irəliləməyə başladı. Bu sırada planetimizi bürüyən məhəlli münaqişələr artsa da, qlobal müharibələrə son qoyuldu. 12 illik keçid dövründə dünyanın siması tamamilə dəyişdi, yeni dühalar, yeni zəkalar meydana gəldi. Fəlsəfi düşüncə tərəqqiyə çatdı, Allahla İblis arasındakı seçim konkretləşdi.

Bir sözlə, hər kəs öz yolunu tapdı. Köhnəfikirli insanlar, şər mücəssəmələri bu real inkişafın qarşısını almağa çalışsalar da, olsa-olsa, onun sürətini cüzi şəkildə ləngidə bildilər.

Nəhayət, 2003-cü ilin 16 fevralında yeni dövrü – Sutökən Erasını qarşıladıq. Nəzərinizə çatdıraq ki, yeni dövr təxminən iki min il davam edəcək və onun himayəsində dünyamıza İlahi Nur işıq saçacaq, Tanrıya yaxın olanlar daha da artacaq. Köklü dəyişikliklər də məhz ilk on ildə cərəyan etməlidir. Fikir versəniz, 2003-cü ildən bu yana nələrin baş verdiyini asanlıqla görə bilərsiniz. Ölkələri feodal əsarətində saxlayan, xalqlara zülm verən diktatorlar sıradan çıxırlar: Əfqanıstan, İraq, Fələstin, Acarıstan, Ukrayna, Gürcüstan, Qırğızıstan, Boliviya, Ekvador, 2011-ci ildən start götürən “ərəb baharı” və neçə-neçə digər ölkələr demokratik cəmiyyətə doğru ilk addımlarını atdılar. Göründüyü kimi bu proses sürətlə davam etməkdədir.

Yeri gəlmişkən, müqəddəs «Avesta»ya görə, Balıqlar Erasında şər xeyir pərdəsi altında gizlənir, pislə yaxşını, dostla düşməni ayırd etmək çətinləşir. Sutökən Erasında isə bu iki əkslik arasında ciddi sədd yaranır. İnsanlar Tanrıya daha da yaxınlaşır, xeyir işlər, ədalətli əməllər daha böyük yer tutur.

Yeni Sutökən Erasının tam oturuşması 2013-cü ilin sonunda baş tutacaq. O vaxta qədər dünyanın mənzərəsi elə dəyişəcək ki, bu gün böyük əksəriyyət o mənzərəni təsəvvürünə belə gətirə bilməz. Həmin dövrdə Latın Amerikasından tutmuş, Afrikaya qədər, İrandan tutmuş Çinə qədər demokratiya küləyi öz təsirini göstərməlidir.

Oxucularımız sual verə bilər, əvvəlki eralarda nə kimi olaylar baş verib? Bu suala cavab aramaq üçün müəyyən araşdırmalara da varmışam. Məsələn...

Şir erasında insanlar daş alətlər düzəltməyə, o cümlədən məhsul yetişdirməyə başlayıblar.
Xərçəng erasında onlar mağaraları tərk edərək yerin səthində yaşayış yerləri tikiblər: əyirmək, tikmək, dulusçuluq yaranıb, Aya sitayiş edilib.

Əkizlər erasında insanlıq üçün ən böyük ixtiralardan olan, vacib ünsiyyət vasitəsi – yazı yaranıb, həmçinin çarx icad edilib.

Buğa erası zəngin arxitekturanın formalaşmasına təkan verib ki, onun da ən bariz nümunəsi Misir sivilizasiyası olub.

Qoç erası nahaq yerə dəmir erası adlandırılmır, bu erada dəmir icad olunub. İnsanların arasına Allah tərəfindən Xilaskarlar göndərilib (Zərdüşt (ə), İbrahim (ə), Musa (ə) və b.), böyük imperiyalar yaranıb.

Yola saldığımız Balıqlar erasında iki nəhəng peyğəmbər — İsa Məsih (ə) və Muhəmməd (s.a.s) pərvəriş tapıb. Amma bu erada iblisanə hakimiyyətlər də özünü göstərib: xaç yürüşləri, islamafobiya, yəhudi ikitirəliyi, inkvizasiya məhkəmələri, dünya müharibələri, terror, satanizm, qara magiya və s.

Yuxarıda sadaladığım 6 erada meydana gələn ictimai hadisələrlə yanaşı, təbiət hadisələri də mövcud olub. Belə ki, bəzi eralar zəlzələlərlə, bəziləri meteorid yağışlarla, digərləri isə vulkan və digər təbii fəlakətlərlə yadda qalıb. Məsələn, bildirilir ki,

Qoç erasından Balıqlar erasına keçid dövründə Yerusəlim məbədi dağıdılıb, Roma kimi nəhəng şəhər tamamilə yanıb, seysmik aktivlik artıb, ağır xəstəliklər çoxlu insan həyatını məhv edib.

Buğadan Qoça keçiddə İnd dərəsinin qədim sivilizasiyası məhv olub, bütün gil ehtiyatları əldən çıxıb.

Xərçəng erası yetişəndə isə bütün dünyada daşqınlar baş verib, əvvəlki dövrlərin bütün qalıqlarını yuyub aparıb. Bəzi alimlər hətta Nuh tufanının məhz Xərçəng erasında baş verdiyi qənaətindədirlər.

Ən dəhşətli fəlakətlər isə Əqrəb erasının gəlişi ilə bağlıdır. Belə ki, nəhəng Atlantida sivilizasiyası məhz bu zaman məhv olub...

Hazırkı dövrün – Sutökən erasının da özünəməxsus əlamətləri var. Bu erada dövlətlər arasındakı sərhədlər götürüləcək, insan birliyinin əsasında ideologiya duracaq və cəmiyyət materiyanın təzyiqindən, diqtəsindən azad olacaq. Sutökən erası insan yaradıcılığını informasiya üzərində quracaq. Cəmiyyətdəki insanlar arasında bölgü yalnız onların intellektual səviyyələrinə görə aparılacaq. Bir sözlə, bu era insanlar arasında bərabərhüquqluluq yaradacaq, neçə-neçə əsrlər boyu sabit qalan astronomik durumu dəyişəcək, bütün Kəhkəşanda (Qalaktikada) qlobal dönüş yaradacaq. Bu era insanların təfəkküründə, dünyagörüşündə, dünyaya və insanlara baxışında böyük rol oynayacaq. Xeyirin Şər üzərində qələbəsi nəhayət ki, təmin olunacaq.

Bundan başqa 2003-cü ildə bir neçə başqa zaman ritmləri də start götürüb. Onlardan ən əhəmiyyətlisi Günəş (Avesta) təqviminin yeni dövrünün başlanmasıdır və bu, 256 il davam edəcək (2003-2259). Bu təqvimin əhəmiyyəti ondadır ki, tarixi irsi, milli-mənəvi xəzinəsi zəngin olan güclü və qədim xalqlar göstərilən iki əsr yarımda itirilmiş potensialını nəinki bərpa edəcək, hətta böyüklüyünü və əzəmətini göstərə biləcək. Tanrı yolunu tutanlar Böyük Qələbəyə qovuşacaqlar.

2003-cü ildə Qalaktika ili də başlayıb və 8,4 milyon il davam edəcək. Bu dövrdə Yerin qalaktikadakı vəziyyəti dəyişəcək. Bundan başqa, qədim hindlilər bildirirdi ki, bu dövrdə Yerdəki şüurun təkamül prosesinin növbəti mərhələsi bitəcək və bəşəriyyət Qalaktikanın informasiya şəbəkəsinə qoşulacaq. Bununla da insanların qarşısında yeni imkanlar açılacaq.
Qədim Mayya təqvimində göstərilirdi ki, qalaktik sinxronlaşdırma şüalarının Yer üzərindən növbəti keçidi 2003-cü ilin sonunda bitəcək (onun diametri 5125 ildir). Qalaktik sinxronlaşdırma şüalarının məqsədi Yer kürəsini təfəkkür səviyyəsinə çatdırmaq idi. İndi hər birimizin təfəkkürü dəyişib, qalır ondan səmərəli şəkildə istifadə etmək.

Təbii ki, deyilənlərlə yanaşı, Sutökən erasında mənfi fəsadlar da qaçılmazdır. Bu dövrdə sunamilər, zəlzələ və daşqınlar geniş vüsət alacaq. Amma daha çox torpaq sürüşmələri və istehsalat qəzaları artacaq. Bundan başqa xalq üsyanları, dövlət çevrilişləri də artacaq.


Bu gün dünya mediasını tutan amillərdən vacib olan ikisi haqqında danışmaq istəyirəm. Onlardan birincisi, Mayya təqvimidir. Bu yazılar haqqında məlumatı olmayanlar, ümumiyyətlə, hər hansı araşdırma aparmayanlar kütləvi informasiya vasitələrinə cəfəng məlumatlar ötürməkdədir. Oxucularımıza çatdırım ki, Mayya kitabələrinin sayı 4-dür. Hazırda söhbət açılan kitab isə 2-cidir. Bu təqvimlərin hər birinin başlanğıcı və sonu var. 2-ci kitabın son heroqlif açması təxminən belədir: “21 dekabr 2012-ci ildə planetlərin paradı olacaq”. Bu isə qeyri-adi bir anlama gəlmir. Çünki planetlərin paradı deyilən astronomik olay hər onillikdə azı bir dəfə baş verir və bunun heç bir fəsadı olmur. Hətta tam güntutulmaları belə ondan daha təsirli olur. Bunu qloballaşdırmaq, miqyasını böyüdüb dəhşətli dərəcəyə gətirmək anlaşılan deyil.
planetlərin paradı
Qandrek monastırının lamasının açıqlamalarına gəlincə, bu daha çox cəfəng və cahili bir addımdır. Astronomiyanı hətta azacıq qavrayan hər kəs bilir ki, onun dəhşətlə bəyan etdiyi astronomik proqnozlar tam boşboğazlıqdır. Və heç bir ciddi, elmi təşkilat və qurumlar buna reaksiya verməyiblər. Həmin o lamanın vaxtilə verdiyi üç məşhur “proqnozu” gəlin, yada salaq: 1. Barak Obama andiçmə mərasiminə qədər öldürüləcək; 2. 2011-ci ilin yayında İran vurulacaq; 3. Müəmmar Qəddafi Mərkəzi Afrikaya qaçacaq. Onun bu proqnozu da “dəqiq” çıxacaq.

Sözardı: Məni bir vətəndaş kimi təəccübləndirən Şamaxı Astrofizika Rəsədxanasında çalışan alimlərimizin belə həssas məqamda susmalarıdır. Əslində bu kimi sualları onlar cavablandırmalıdır. Təəssüf ki, onlar yalnız Novruzun başlanması dəqiqəsini bir neçə gün öncə göstərməklə öz işlərini bitmiş hesab edirlər. Halbuki bunu biz də onlardan çox-çox əvvəl təyin edə bilirik. Məsələn, 2013-cü ildə Yeni il (Günəşin Qoç bürcünə daxil olması) martın 21-də Bakı vaxtilə saat 15:01-də başlayacaq. Qoy martın ortalarında bir də əziyyət çəkib hesablamasınlar.


Tarix: 26.11.2014 / 12:07 Müəllif: Aziza Baxılıb: 233 Bölmə: Maraqlı Melumatlar