Qardaşımın dərdi
Dərdim bir olsaydı, olmazdı qəmim,
Gör nə günə saldı zəmanə məni.
Üstümdə saç yolub ağlayan ana,
Nə üçün gətirdin cahana məni!
Kinimdən quruyub gözümdə yaşım,
Gəlsin köməyimə dostum, qardaşım,
Əyilməz kimsəyə bəlalı başım,
Yadlar boyasa da al qana məni.
Haqsız döyülməkdən üzüm göyərib,
Öz ana yurdumda qəribəm, qərib.
Damlarda bayquşlar səs-səsə verib,
Bu dərddir gətirən fəğana məni.
Cəlladlar boyamış qana vətəni,
Zülmdən gətirib cana vətəni,
Satmaram milləti, ana vətəni,
Tutub salsalar da zindana məni.
Ayağımda zəncir, qolumda zəncir,
Səslənir sağımda, solumda zəncir,
Qalanıb dağ kimi yolumda zəncir,
Qoy ellər bilməsin divanə məni.
Çoxdandır bir şirin dilə həsrətim,
Bir doğma qardaşa, elə həsrətəm,
Yuvasız bülbüləm, gülə həsrətəm,
Tanıyır xaraba, viranə məni.
Nədir bu ayrılıq bilə bilmirəm,
Nədən bülbül qonmaz gülə, bilmirəm,
Gülmək istəyirəm, gülə bilmirəm,
Aparın şimala, loğmana məni.
Dinləsin arzumu yaslı durnalar,
Dərdi çox, söhbətli, sazlı durnalar,
Alıb qanadına nazlı durnalar
Aparsın o gözəl məkana məni!
Tarix: 29.05.2015 / 12:33 Müəllif: Aziza Baxılıb: 188 Bölmə: Süleyman Rüstəm
loading...