beyaz.az

Haqqinda.az

Axtardığın haqqında - Hər gün yeni məlumat öyrən

Tələbələrin ən çox işlətdiyi yalanlar

Tələbələr bir-birilərini müdafiə etmək üçün hər cür yalan deyə bilərlər. Bu yalanlar çox təbii və hərdən də çox gülməli görünür.
Bəs tələbələrin ən çox işlətdiyi yalanlar hansılardır?
1. "Müəllim, qayıb yazmayın, indi gəlir”
Tələbənin ən yaralı yeri qayıbdır. Hətta bizə uşaq vaxtı deyilən "Filan şeyi sayma, azalar” misalı da qayıb mövzusunda gücsüzdür. Qayıb yeganə şeydir ki, saydıqca artır.
2. "Oxuduğumdan biri də düşmədi”
Bu hal, necə deyərlər, "başımıza gələndən sonra başmaqçı oluruq”. İmtahanda qəfil elə bilet düşür ki, hamısı zəif bildiyimiz mövzular olur. Qonşu tələbənin biletindəkiləri isə əzbər bilirik. Bunun sadəcə "şanssızlıq”dan adı yoxdur.
3. "O, uzaqda qalır”
Yenə qayıb dərdinin üstünə gəlirik. Qayıb yazdırmamağın başqa bir bəhanəsi də budur: "Müəllim o, uzaqda qalır, 3 avtobus dəyişir”. İstər-istəməz bunu eşidən müəllim əlini saxlamalı olur.
4. "Qrupun yeganə qızıdır”
Universitetlərdə elə fakültələr var ki, orda doğrudan da "qız qıtlığı” var. Hətta bəzilərində heç yoxdur. Qrupun tək qızı olmağın həm üstünlükləri var, həm də çatışmazlıqları. Qiymət yazılanda "tək” olmaq nə qədər xoşdursa, jurnal yazmaq, daşımaq da o qədər çətindir.
5. "Söz verirəm, gələn dərs danışacam”
Bu tələbəyə deyən lazımdır ki, axır-əvvəl onsuz da cavab verəcəksən, bunu vaxtında öyrən də. Tələbə həmişə azlığından-çoxluğundan asılı olmayaraq, "vaxt udmağı” böyük qazanc hesab edir.
6. "Kəsilən çox oldu”
İmtahan bitir, artıq təxminlərinə görə kəsilmisən. Bunu evdə bir cür açıqlamalısan. Ancaq bəhanə düşünürsən. Bu vaxt məlum olur ki, daha bir nəfər də kəsilib, yəni "sən tək deyilsən”. Əslində, onun yerinə sevinməsən də, hardasa təsəlli olur. Evdə deyiləcək sözümüz var artıq: "Kəsilən çox idi. Bu qədər çətin gözləmirdik”.
7. "Evdən zəng vururlar e, cavab verməliyəm”
Dərsdən 10 dəqiqəlik də olsun qaçmaq üçün "müəllim, evdən zəng vururlar e, olar çıxım?” bəhanəsi o qədər də uğurlu deyil. Müəllimlərin də tutarlı cavabları olur: "Evdə bilmirlər ki, sən dərsdəsən?”
8. "Yerliyik ki!”
Müəllimlə bir rayon, bir bölgədən olmaqdan yaxşı nə ola bilər? Bir dəfə belə rayona getməyən adamın bütün qohum-əqrəbası yadına düşür, cəmi bir neçə dəqiqəyə "qlamur tələbə” olur "rayon uşağı”.
9. "Bu, oxuyan uşaqdı e, müəllim”
Müəllimlər bu sözü ən çox qiymət yazılanda eşidirlər. Bu o deməkdir ki, bu uşaq imtahanda sizin üzünüzü qara etməz.
10. "Tapış”
"Tapış” sözünün mənasını hamı çox yaxşı bilir. "Tapşırılmış uşaq” olmaq universitetə "qızıl zənbillə” düşmüş deməkdir, onun üçün həmişə hava yaxşıdır, həmişə müəllimlər mələkdir.


Tarix: 22.11.2014 / 23:04 Müəllif: Aziza Baxılıb: 96 Bölmə: Maraqlı Melumatlar